Weverse Con Festival: 2027ರ ಮಾರ್ಚ್ 27, 28ರಂದು ಭಾರತದಲ್ಲಿ ಮೊದಲ ಬಾರಿಗೆ K-pop ಸಂಗೀತೋತ್ಸವ!

ಮುಂಬೈ (ಅ.08): ಜಾಗತಿಕ ಮಟ್ಟದಲ್ಲಿ ಖ್ಯಾತಿ ಪಡೆದಿರುವ ಪ್ರಮುಖ K-pop ಸಂಗೀತೋತ್ಸವಗಳಲ್ಲಿ ಒಂದಾದ Weverse Con Festival, ಇದೇ ಮೊದಲ ಬಾರಿಗೆ ಭಾರತಕ್ಕೆ ಕಾಲಿಡಲಿದೆ. ಹೈಬ್ ಆಯೋಜಿಸುತ್ತಿರುವ ಈ ಎರಡು ದಿನಗಳ ಸಂಗೀತ ಕಾರ್ಯಕ್ರಮವು 2027ರ ಮಾರ್ಚ್ 27 ಮತ್ತು 28ರಂದು ನವದೆಹಲಿಯಲ್ಲಿ ನಡೆಯಲಿದೆ. ದಕ್ಷಿಣ ಕೊರಿಯಾದ ಹೊರಗೆ ಆಯೋಜನೆಯಾಗುತ್ತಿರುವ ಮೊದಲ Weverse Con Festival ಇದಾಗಿದೆ.

ಭಾರತದಲ್ಲಿ ನಡೆಯಲಿರುವ ಪ್ರಮುಖ K-pop ಸಂಗೀತೋತ್ಸವಗಳಲ್ಲಿ ಇದು ಕೂಡ ಒಂದಾಗಿದ್ದು, ದೇಶ-ವಿದೇಶಗಳ ಹೆಸರಾಂತ ಕಲಾವಿದರ ಪ್ರದರ್ಶನಗಳು, ವೈಭವದ ಕಾರ್ಯಕ್ರಮಗಳು ಮತ್ತು ಅಭಿಮಾನಿಗಳಿಗಾಗಿ ಮೀಸಲಾದ ವಿಶೇಷ ಚಟುವಟಿಕೆಗಳು ಒಂದೇ ವೇದಿಕೆಯಲ್ಲಿ ಲಭ್ಯವಿರಲಿವೆ.

Weverse ಮೂಲಕ ಜಾಗತಿಕ ಅಭಿಮಾನಿಗಳನ್ನು ನೇರ ಅನುಭವದೊಂದಿಗೆ ಬೆಸೆಯುವುದು ಈ ಉತ್ಸವದ ಪ್ರಮುಖ ವೈಶಿಷ್ಟ್ಯವಾಗಿದೆ. ಇಲ್ಲಿ ಕೇವಲ ಸಂಗೀತ ಪ್ರದರ್ಶನಗಳು ಮಾತ್ರವಲ್ಲದೆ, ಅಭಿಮಾನಿಗಳ ಸಂವಾದ, ವಿವಿಧ ಮನರಂಜನಾ ಚಟುವಟಿಕೆಗಳು, ಬ್ರ್ಯಾಂಡ್‌ಗಳ ವಿಶೇಷ ಮಳಿಗೆಗಳು ಹಾಗೂ ವೈವಿಧ್ಯಮಯ ಸಾಂಸ್ಕೃತಿಕ ಅನುಭವಗಳಿಗೂ ಅವಕಾಶ ಕಲ್ಪಿಸಲಾಗಿದೆ.

ಕಲಾವಿದರು ಮತ್ತು ಅಭಿಮಾನಿಗಳ ನಡುವಿನ ನೇರ ಸಂಪರ್ಕಕ್ಕೆ ಈ ಉತ್ಸವದಲ್ಲಿ ಹೆಚ್ಚಿನ ಒತ್ತು ನೀಡಲಾಗಿದೆ. ತಮ್ಮ ನೆಚ್ಚಿನ ತಾರೆಗಳು ಮತ್ತು ಇತರ ಅಭಿಮಾನಿಗಳೊಂದಿಗೆ ಬೆರೆಯಲು ಪ್ರೇಕ್ಷಕರಿಗೆ ಹಲವು ಅವಕಾಶಗಳು ದೊರೆಯಲಿವೆ. ಭಾರತೀಯ ಹಾಗೂ K-pop ಕಲಾವಿದರ ಜೊತೆಗೆ, ವಿವಿಧ ದೇಶಗಳ ಕಲಾವಿದರು ಒಂದೇ ವೇದಿಕೆಯಲ್ಲಿ ಕಾಣಿಸಿಕೊಳ್ಳಲಿದ್ದು, ಈ ಪ್ರದರ್ಶನಗಳು ಉತ್ಸವದ ಪ್ರಮುಖ ಆಕರ್ಷಣೆಯಾಗಲಿವೆ.

ಭಾರತೀಯ ಪ್ರೇಕ್ಷಕರಿಗೆ ಹೊಸ ಅನುಭವ

ಹೈಬ್ ನ ಸಿಇಒ ಜಾಸನ್ ಜೈಸಾಂಗ್ ಲೀ ಮಾತನಾಡಿ, 'Weverse Con Festival India ಮೂಲಕ ನಮ್ಮ ‘multi-home, multi-genre’ ಕಾರ್ಯತಂತ್ರದ ಹೊಸ ಅಧ್ಯಾಯ ಪ್ರಾರಂಭವಾಗಲಿದೆ. ಜಾಗತಿಕ ಮಟ್ಟದಲ್ಲಿ ಹೈಬ್ ನ ಬೆಳವಣಿಗೆಗೆ ಭಾರತವು ಪ್ರಮುಖ ಮಾರುಕಟ್ಟೆಯಾಗಿದೆ. ಭಾರತದ ಸೃಜನಶೀಲತೆಯನ್ನು ನಮ್ಮ ಜಾಗತಿಕ ಅನುಭವದೊಂದಿಗೆ ಬೆರೆಸಿ, ಭಾರತೀಯ ಪ್ರೇಕ್ಷಕರಿಗೆ ಹತ್ತಿರವಾಗುವ ಹೊಸ ಅನುಭವವನ್ನು ನೀಡಲು ನಾವು ಬಯಸಿದ್ದೇವೆ. ಅಭಿಮಾನಿಗಳು ತಮ್ಮ ನೆಚ್ಚಿನ ಕಲಾವಿದರೊಂದಿಗೆ ಸಂಪರ್ಕ ಸಾಧಿಸಿ, ಸಂಭ್ರಮಿಸಿ ಮತ್ತು ಹೊಸ ಅನುಭವಗಳನ್ನು ಪಡೆಯುವಂತಹ ಉತ್ಸವವನ್ನು ಭಾರತದಲ್ಲಿ ಆಯೋಜಿಸಲು ನಾವು ಉತ್ಸುಕರಾಗಿದ್ದೇವೆ' ಎಂದು ತಿಳಿಸಿದರು.

Weverse ಕಂಪನಿಯ ಅಧ್ಯಕ್ಷ ಝೋಯಿಲ್ ಯಾಂಗ್ ಮಾತನಾಡಿ, 'ವಿಶ್ವದ ಅತಿ ದೊಡ್ಡ K-pop ಅಭಿಮಾನಿ ಸಮುದಾಯವನ್ನು ಹೊಂದಿರುವ ದೇಶಗಳಲ್ಲಿ ಭಾರತವೂ ಒಂದು. ಹೈಬ್ ಜೊತೆಗೂಡಿ Weverse Con Festival ಅನ್ನು ಭಾರತಕ್ಕೆ ತರುತ್ತಿರುವುದಕ್ಕೆ ನಮಗೆ ಸಂತೋಷವಿದೆ. Weverse ಮೂಲಕ ಆನ್‌ಲೈನ್‌ನಲ್ಲಿ ಕಲಾವಿದರು ಮತ್ತು ಅಭಿಮಾನಿಗಳನ್ನು ಸಂಪರ್ಕಿಸುತ್ತಿದ್ದೇವೆ. ಇದೀಗ ಈ ಉತ್ಸವದ ಮೂಲಕ ಆ ಅನುಭವವನ್ನು ಅಭಿಮಾನಿಗಳಿಗೆ ನೇರವಾಗಿ ಒದಗಿಸಲು ನಾವು ಇಚ್ಛಿಸುತ್ತೇವೆ' ಎಂದರು.

Weverse Con Festival India ಅನ್ನು ಬುಕ್ ಮೈ ಶೋನ ಲೈವ್ ಮನರಂಜನಾ ವಿಭಾಗವಾದ ಬುಕ್ ಮೈ ಶೋ ಲೈವ್ ಸಹ-ನಿರ್ಮಾಣ ಮಾಡಲಿದ್ದು, ಪ್ರಚಾರದ ಜವಾಬ್ದಾರಿಯನ್ನೂ ನಿರ್ವಹಿಸಲಿದೆ. ಭಾರತದಲ್ಲಿ K-pop ಕಾರ್ಯಕ್ರಮಗಳಿಗೆ ಹೆಚ್ಚುತ್ತಿರುವ ಬೇಡಿಕೆಯನ್ನು ಗಮನದಲ್ಲಿಟ್ಟುಕೊಂಡು, ಉತ್ಸವವನ್ನು ಬೃಹತ್ ಮಟ್ಟದಲ್ಲಿ ಆಯೋಜಿಸಲು ಬುಕ್ ಮೈ ಶೋ ಲೈವ್ ತನ್ನ ಅನುಭವ ಮತ್ತು ವ್ಯಾಪಕ ಪ್ರೇಕ್ಷಕರ ಸಂಪರ್ಕವನ್ನು ಬಳಸಿಕೊಳ್ಳಲಿದೆ. ಉತ್ಸವದ ಟಿಕೆಟ್‌ಗಳು ಬುಕ್ ಮೈ ಶೋನಲ್ಲಿ ಮಾತ್ರ ಲಭ್ಯವಿರುತ್ತವೆ.

ಹೈಬ್ ಮತ್ತು Weverse ಜೊತೆಗೆ Kia India, Mastercard, Project B ಹಾಗೂ Samsung ಉತ್ಸವದ ಪ್ರಮುಖ ಪಾಲುದಾರರಾಗಿ ಕೈಜೋಡಿಸಿವೆ. NONGSHIM ಸಹ ಅಸೋಸಿಯೇಟ್ ಪಾಲುದಾರರಾಗಿ ಸೇರ್ಪಡೆಗೊಂಡಿದೆ. ಉತ್ಸವದ ಬ್ಯಾಂಕಿಂಗ್ ಪಾಲುದಾರರಾದ Mastercard, ತನ್ನ ಕಾರ್ಡ್‌ದಾರರಿಗೆ ಟಿಕೆಟ್‌ಗಳ ಮುಂಗಡ ಬುಕ್ಕಿಂಗ್‌ಗೆ ವಿಶೇಷ ಅವಕಾಶವನ್ನು ಕಲ್ಪಿಸಲಿದೆ.

ಉತ್ಸವದ ಉದ್ದೇಶವೇನು?

ಉತ್ಸವದ ಮೊದಲ ಭಾರತೀಯ ಆವೃತ್ತಿಯಲ್ಲಿ ವಿಶ್ವದ ಪ್ರಮುಖ K-pop ಕಲಾವಿದರೊಂದಿಗೆ ಭಾರತದ ವಿವಿಧ ಸಂಗೀತ ಕ್ಷೇತ್ರಗಳ ಕಲಾವಿದರೂ ಭಾಗವಹಿಸಲಿದ್ದಾರೆ. ಭಾರತೀಯ ಮತ್ತು ಜಾಗತಿಕ ಸಂಗೀತವನ್ನು ಒಂದೇ ವೇದಿಕೆಯಲ್ಲಿ ಪ್ರಸ್ತುತಪಡಿಸುವ ಮೂಲಕ, ಅಭಿಮಾನಿಗಳಿಗೆ ಹೊಸ ಶೈಲಿಯ ಸಂಗೀತ ಮತ್ತು ಮನರಂಜನೆಯ ಅನುಭವ ನೀಡುವುದು ಈ ಉತ್ಸವದ ಮುಖ್ಯ ಉದ್ದೇಶವಾಗಿದೆ.

ಭಾರತದಲ್ಲಿ K-pop ಮತ್ತು ಜಾಗತಿಕ ಸಂಗೀತದ ಅಭಿವೃದ್ಧಿಗೆ ಹೈಬ್ ತನ್ನ ಬದ್ಧತೆಯನ್ನು ಮುಂದುವರಿಸಿದೆ. ಹೈಬ್ ನ ಭಾರತದಲ್ಲಿನ ಕಚೇರಿಯಾದ ಹೈಬ್ ಇಂಡಿಯಾ, ದೇಶಾದ್ಯಂತ ಆಡಿಷನ್‌ಗಳನ್ನು ನಡೆಸಿ ಸ್ಥಳೀಯ ಪ್ರತಿಭೆಗಳನ್ನು ಗುರುತಿಸಿ ಬೆಳೆಸುತ್ತಿದೆ. ಇದರ ಜೊತೆಗೆ, ಭಾರತೀಯ ಪ್ರೇಕ್ಷಕರಿಗೆ ಇಷ್ಟವಾಗುವ ಮತ್ತು ಜಾಗತಿಕ ಮಟ್ಟದಲ್ಲಿ ಗುರುತಿಸಿಕೊಳ್ಳುವಂತಹ ವಿಷಯಗಳು ಹಾಗೂ ಕಲಾವಿದರನ್ನು ರೂಪಿಸುವತ್ತವೂ ಸಂಸ್ಥೆ ಗಮನಹರಿಸಿದೆ.