ಫೈಜರ್ ಹೆಸರಲ್ಲಿ ನಕಲಿ ಔಷಧಿ ಜಾಲ: 15,000 ನಕಲಿ ವಯಲ್ ಮಾರಾಟ ಮಾಡಿ ಒಂದೂವರೆ ವರ್ಷದಲ್ಲಿ ₹10 ಕೋಟಿ ಲೂಟಿ!

ಬೆಂಗಳೂರು: ಕರ್ನಾಟಕದಲ್ಲಿ ಬೆಳಕಿಗೆ ಬಂದಿರುವ ನಕಲಿ ಆ್ಯಂಟಿಬಯೋಟಿಕ್ ಮತ್ತು ಐಸಿಯು ಔಷಧಗಳ ಹಗರಣಕ್ಕೆ ಸಂಬಂಧಿಸಿದಂತೆ ಕಳವಳಕಾರಿ ಸಂಗತಿಯೊಂದು ಹೊರಬಿದ್ದಿದೆ. SIT ನಡೆಸುತ್ತಿರುವ ತನಿಖೆಯ ಪ್ರಕಾರ, ಕಳೆದ ಒಂದೂವರೆ ವರ್ಷದ ಅವಧಿಯಲ್ಲಿ ಆರೋಪಿಗಳು 15,000 ಕ್ಕೂ ಅಧಿಕ ನಕಲಿ ಆ್ಯಂಟಿಬಯೋಟಿಕ್ ಚುಚ್ಚುಮದ್ದಿನ ಬಾಟಲಿಗಳನ್ನು ರಾಜ್ಯದ ವಿವಿಧ ಆಸ್ಪತ್ರೆ ಹಾಗೂ ಫಾರ್ಮಸಿಗಳಿಗೆ ಸರಬರಾಜು ಮಾಡಿರುವುದು ಬೆಳಕಿಗೆ ಬಂದಿದೆ. ಈ ಕುರಿತಾದ ವಿವರಗಳು ಇಲ್ಲಿವೆ:

15,000 ನಕಲಿ ವಯಲ್‌ಗಳ ವಿತರಣೆ

ಬೆಂಗಳೂರು ಹೊರವಲಯದ ಬಿಡದಿಯ ಫಾರ್ಮ್‌ಹೌಸ್ ಒಂದರಲ್ಲಿ ಈ ನಕಲಿ ಜೀವರಕ್ಷಕ ಔಷಧಿಗಳನ್ನು ಕಾನೂನುಬಾಹಿರವಾಗಿ ತಯಾರಿಸಲಾಗುತ್ತಿತ್ತು. ಪ್ರಕರಣದ ತನಿಖೆಯ ವೇಳೆ ಬಹಿರಂಗವಾಗಿರುವಂತೆ, ಹೈದರಾಬಾದ್, ಚೆನ್ನೈ ಮತ್ತು ಉತ್ತರಾಖಂಡ್‌ ರಾಜ್ಯಗಳಿಂದ ಅಗ್ಗದ ಬೆಲೆಯ ಅಥವಾ ಅವಧಿ ಮುಗಿದ ಕಳಪೆ ಗುಣಮಟ್ಟದ ರಾಸಾಯನಿಕ ಹಾಗೂ ಔಷಧಿಗಳನ್ನು ತರಿಸಿ, ಅವುಗಳನ್ನು ಹೊಸ ಸೀಸೆಗಳಲ್ಲಿ ತುಂಬಿಸಿ, ಫಿಜರ್ ನಂತಹ ಜಾಗತಿಕ ಕಂಪನಿಗಳ ನಕಲಿ ಲೇಬಲ್‌ಗಳನ್ನು ಅಂಟಿಸಿ ಮಾರಾಟ ಮಾಡಲಾಗುತ್ತಿತ್ತು. ಈ ರೀತಿಯಾಗಿ, ಆರೋಪಿಗಳು ಈಗಾಗಲೇ 15,000 ಕ್ಕೂ ಹೆಚ್ಚು ನಕಲಿ ಆ್ಯಂಟಿಬಯೋಟಿಕ್ ಇಂಜೆಕ್ಷನ್ ವಯಲ್‌ಗಳನ್ನು ಪೂರೈಕೆ ಮಾಡಿದ್ದಾರೆ. ಇವುಗಳು ಐಸಿಯುನಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ರೋಗಿಗಳಿಗೆ ಹಾಗೂ ತೀವ್ರ ಬ್ಯಾಕ್ಟೀರಿಯಾ ಸೋಂಕಿನ ಚಿಕಿತ್ಸೆಗೆ ಬಳಸಲಾಗುವ ದುಬಾರಿ ಔಷಧಗಳಾಗಿವೆ. ವಿಶೇಷ ತನಿಖಾ ತಂಡದ ತನಿಖೆಯ ಪ್ರಕಾರ, ಆರೋಪಿಗಳು ಪ್ರತಿ ವಯಲ್‌ ಅನ್ನು ₹5,500 ರಿಂದ ₹6,500 ರವರೆಗಿನ ದರಕ್ಕೆ ಮಾರಾಟ ಮಾಡಿ, ಕಳೆದ ಕೆಲವೇ ತಿಂಗಳುಗಳಲ್ಲಿ ₹10 ಕೋಟಿಗೂ ಅಧಿಕ ಹಣವನ್ನು ಗಳಿಸಿರಬಹುದು ಎಂದು ಶಂಕಿಸಲಾಗಿದೆ.

90 ಕ್ಕೂ ಹೆಚ್ಚು ಆಸ್ಪತ್ರೆಗಳಿಗೆ ಪೂರೈಕೆ

ಈ ನಕಲಿ ಔಷಧಿಗಳನ್ನು ಡಿಎಂ ಫಾರ್ಮಾ ಮತ್ತು ಕೃಪಾ ಫಾರ್ಮಾ ಮೂಲಕ ಬೆಂಗಳೂರು ಸೇರಿದಂತೆ ರಾಜ್ಯದಾದ್ಯಂತ ಇರುವ 90 ಕ್ಕೂ ಹೆಚ್ಚು ಪ್ರಮುಖ ಆಸ್ಪತ್ರೆ ಮತ್ತು ಕ್ಲಿನಿಕ್‌ಗಳಿಗೆ ಕಡಿಮೆ ಬೆಲೆಗೆ ಪೂರೈಕೆ ಮಾಡಲಾಗಿತ್ತು. ಈ ದಂಧೆಯ ಮುಖ್ಯ ಸೂತ್ರಧಾರನಾದ ಆರ್. ಪ್ರಶಾಂತ್ ಬಾಬು ಅಜೆರ್ಬೈಜಾನ್‌ಗೆ ಪರಾರಿಯಾಗಿದ್ದನು. ಆದಾಗ್ಯೂ, ಆತ ಬೆಂಗಳೂರಿನ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿಯುತ್ತಿದ್ದಂತೆ ಎಸ್‌ಐಟಿ (SIT) ಅಧಿಕಾರಿಗಳು ಆತನನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ. ಈ ಪ್ರಕರಣದಲ್ಲಿ ಇಲ್ಲಿಯವರೆಗೆ ಒಟ್ಟು 7 ಜನರನ್ನು ಬಂಧಿಸಲಾಗಿದೆ.