ಸುಳ್ಯ: ಒಣ ಕಸದ ಸಮಸ್ಯೆಗೆ ಮುಕ್ತಿ; ಸ್ವಚ್ಛ ಭಾರತ್ ಮಿಷನ್ ಅಡಿಯಲ್ಲಿ ಕೇಂದ್ರ ಆರಂಭ!

ಸುಳ್ಯ ಪಟ್ಟಣದಲ್ಲಿ ಪ್ಲಾಸ್ಟಿಕ್ ಸೇರಿದಂತೆ ಒಣ ಕಸವನ್ನು ನಿರ್ವಹಿಸುವ ಸಲುವಾಗಿ ಸ್ವಚ್ಛ ಭಾರತ್ ಮಿಷನ್ ಅಡಿಯಲ್ಲಿ ಸಮಗ್ರ ಒಣ ತ್ಯಾಜ್ಯ ನಿರ್ವಹಣಾ ಕೇಂದ್ರವು ಕಾರ್ಯನಿರ್ವಹಿಸಲು ಆರಂಭಿಸಿದೆ. ಇದರೊಂದಿಗೆ ಕಸ ವಿಲೇವಾರಿಗೆ ಶಾಶ್ವತ ಪರಿಹಾರ ಸಿಕ್ಕಂತಾಗಿದೆ.

ಕಲ್ಚರ್ಪೆಯಲ್ಲಿರುವ ಕಸದ ಡಂಪಿಂಗ್ ಯಾರ್ಡ್‌ನಲ್ಲಿ ಈ ತ್ಯಾಜ್ಯ ನಿರ್ವಹಣಾ ಕೇಂದ್ರ ಸ್ಥಾಪಿತವಾಗಿದೆ. ಪಂಚಾಯಿತಿ ಕಚೇರಿಯ ಹತ್ತಿರ ಹಾಗೂ ವಾಹನ ಪಾರ್ಕಿಂಗ್ ಜಾಗದಂತಹ ಸ್ಥಳಗಳಲ್ಲಿ ರಾಶಿ ಬೀಳುತ್ತಿದ್ದ ಒಣ ಕಸದ ಸಮಸ್ಯೆಗೆ ಈಗ ಮುಕ್ತಿ ಸಿಗುವ ನಿರೀಕ್ಷೆಯಿದೆ.

ನಗರದಲ್ಲಿ ಪ್ರತಿನಿತ್ಯ ಸಂಗ್ರಹಿಸುವ ಕಸವನ್ನು ಹಸಿ ಕಸ ಮತ್ತು ಒಣ ಕಸ ಎಂದು ವಿಂಗಡಿಸಲಾಗುತ್ತಿದೆ. ಹಸಿ ಕಸವನ್ನು ಗೊಬ್ಬರ ತಯಾರಿಕೆಗಾಗಿ ಖಾಸಗಿಯವರಿಗೆ ಹಸ್ತಾಂತರಿಸಲಾಗುತ್ತದೆ. ಹಿಂದೆ ಒಣ ಕಸವನ್ನು ಗೋಣಿ ಚೀಲಗಳಲ್ಲಿ ತುಂಬಿ ಇಡಲಾಗುತ್ತಿತ್ತು. ಈಗ ಈ ಕೇಂದ್ರದಲ್ಲಿರುವ ಕಸ ವಿಂಗಡಣಾ ಮೆಷಿನ್ ಮೂಲಕ ಒಣ ಕಸವನ್ನು ಬೇರ್ಪಡಿಸಿ, ಬೇಲಿಂಗ್ ಮೆಷಿನ್ ಬಳಸಿ ಪ್ರತ್ಯೇಕ ಕಟ್ಟುಗಳಾಗಿ ಪ್ಯಾಕ್ ಮಾಡಲಾಗುತ್ತದೆ. ಈ ಪ್ಲಾಸ್ಟಿಕ್ ಕಟ್ಟುಗಳನ್ನು ಮರುಬಳಕೆ ಮಾಡುವ ಕಾರ್ಖಾನೆಗಳಿಗೆ ರವಾನಿಸಲು ಯೋಜಿಸಲಾಗಿದೆ.

ಸ್ವಚ್ಛ ಭಾರತ ಮಿಷನ್ ಯೋಜನೆಯಡಿ ಸಮಗ್ರ ಒಣತ್ಯಾಜ್ಯ ನಿರ್ವಹಣಾ ಕೇಂದ್ರ (ಎಂಆರ್‌ಎಫ್) ನಿರ್ಮಾಣವಾಗಿದೆ. ಈ ಕೇಂದ್ರದ ಕಟ್ಟಡಕ್ಕಾಗಿ ₹32 ಲಕ್ಷ ಹಾಗೂ ವಿವಿಧ ಯಂತ್ರೋಪಕರಣಗಳ ಅಳವಡಿಕೆಗೆ ₹15 ಲಕ್ಷ ವೆಚ್ಚ ಮಾಡಲಾಗಿದೆ. ಇದರಲ್ಲಿ ₹9 ಲಕ್ಷ ವೆಚ್ಚದಲ್ಲಿ ಒಣ ತ್ಯಾಜ್ಯ ಬೇರ್ಪಡಿಸುವ ಯಂತ್ರ, ಲಿಪ್ಟಿಂಗ್ ಯಂತ್ರ, ಶಿಪ್ಟಿಂಗ್ ವಾಹನ ಮತ್ತು ₹6 ಲಕ್ಷ ವೆಚ್ಚದಲ್ಲಿ ಬೇಲಿಂಗ್ ಯಂತ್ರ (ಸಕ್ಕಿಂಗ್ ಮೆಷಿನ್) ಅಳವಡಿಸಲಾಗಿದೆ.

ವಿದ್ಯುತ್ ಚಾಲಿತ ಯಂತ್ರಗಳ ನೆರವಿನಿಂದ ಬೇರ್ಪಡಿಸಿದ ಒಣ ಕಸವನ್ನು ವಿವಿಧ ವಿಭಾಗಗಳಾಗಿ ಬೇಲಿಂಗ್ ಮೆಷಿನ್‌ಗೆ ಹಾಕಿ ಕಟ್ಟುಗಳಾಗಿ ಪರಿವರ್ತಿಸಲಾಗುತ್ತದೆ. ಒಂದೇ ಬಾರಿಗೆ ಸುಮಾರು 200 ಕೆಜಿ ತೂಕದ ಕಟ್ಟುಗಳನ್ನು ನಿರ್ಮಿಸಲು ಸಾಧ್ಯವಿದ್ದರೂ, ಸಾಗಣೆಯ ಅನುಕೂಲಕ್ಕಾಗಿ ಸದ್ಯ 80 ಕೆಜಿಯಿಂದ 100 ಕೆಜಿ ತೂಕದ ಕಟ್ಟುಗಳನ್ನು ತಯಾರಿಸಲಾಗುತ್ತಿದೆ. ಸುಸ್ಥಿತಿಯಲ್ಲಿ ಪ್ಯಾಕ್ ಆಗಿ ಬರುವ ಕಸದ ಕಟ್ಟುಗಳನ್ನು ತೂಕ ಮಾಡಿ, ಕೆ.ಜಿ ನಮೂದಿಸಿ ಸಂಗ್ರಹಿಸಲಾಗುತ್ತಿದೆ. ಬಿಳಿ ಪ್ಲಾಸ್ಟಿಕ್, ಬಣ್ಣದ ಪ್ಲಾಸ್ಟಿಕ್ ಕವರ್‌‌ಗಳು, ಬಟ್ಟೆ, ಕಾಗದ, ಜ್ಯೂಸ್, ಮದ್ಯ ಮತ್ತಿತರ ಪಾನೀಯಗಳ ಟೆಟ್ರಾ ಪ್ಯಾಕ್‌ಗಳು ಹಾಗೂ ಪ್ಲಾಸ್ಟಿಕ್ ಬಾಟಲಿಗಳಂತಹ ವಿವಿಧ ಬಗೆಯ ಒಣ ಕಸಗಳನ್ನು ಕಟ್ಟುಗಳಾಗಿ ಮಾಡಲಾಗುತ್ತಿದೆ.

ಕೇಂದ್ರವು ಕಾರ್ಯಾರಂಭ ಮಾಡಿದ ಬಳಿಕ ಪಂಚಾಯಿತಿ ಮುಂಭಾಗ ಮತ್ತು ಕಲ್ಚರ್ಪೆಯಲ್ಲಿ ಶೇಖರಣೆಯಾಗಿದ್ದ ಒಣ ಕಸದ ಪ್ರಮಾಣವು ಕ್ರಮೇಣ ಕಡಿಮೆಯಾಗುತ್ತಿದೆ. ಒಣ ಕಸವನ್ನು ಪ್ಲಾಸ್ಟಿಕ್ ಮರು ಬಳಕೆ ಮಾಡುವ ಕಾರ್ಖಾನೆಗಳಿಗೆ ಕಳುಹಿಸಲು ಪಂಚಾಯಿತಿ ಸಿದ್ಧತೆ ನಡೆಸಿದೆ. ಈಗಾಗಲೇ 4-5 ಟನ್ ಒಣ ಕಸವನ್ನು ಕಟ್ಟುಗಳಾಗಿ ಮಾಡಲಾಗಿದೆ. ಸುಮಾರು 15 ಟನ್ ಸಂಗ್ರಹವಾದ ನಂತರ ಟೆಂಡರ್ ಕರೆದು ಪ್ಲಾಸ್ಟಿಕ್ ಮರುಬಳಕೆ ಮಾಡುವ ಕಾರ್ಖಾನೆಗಳಿಗೆ ಮಾರಾಟ ಮಾಡಲಾಗುವುದು ಎಂದು ಪಟ್ಟಣ ಪಂಚಾಯಿತಿ ಮುಖ್ಯಾಧಿಕಾರಿ ಬಸವರಾಜ್ ಎಚ್.ಆರ್ ಅವರು ‘ಪ್ರಜಾವಾಣಿ’ಗೆ ತಿಳಿಸಿದ್ದಾರೆ.